بلـوچستــان ءِ آزاتــی ءِ روچ مبـارک بـات‏

رودراتکــی بلوچستــان وتــی آزاتی پسنديـں رهدربرانـی جهـدان ءُ شهيــدانـی هونانی برکـت ءَ رنـد چه دوئمــی جهانـی جنگ ءَ آزات ءُ وت مستــربـوت. بلـوچستان ءِ آزاتی ءِ جـار يازده اگسـت ۱۹۴۷ ءَ شنــگ بـوت ءُ گـوں خان کــلات ءِ سرکماشــی ءَ آزاتيـــں بلوچستـان ءِ بيـرک مـاں کــلات ءَ بــرز کنـگ بــوت.

http://baluchsarmachar.files.wordpress.com/2009/05/balochistan-declaration-of-independence-11-aug-1947-1.jpg
 
مـاں بلـوچستــــان ءِ آزاتـی ءِ جـار ءَ نبشته کنـگ بوتـه که محمد علـی جناح ءِ جـند هم بلـوچستــــان ءِ ءِ وت مستری ءَ منـّت.
وت مستريـں بلـوچستــــان ءِ سروک ءُ مهلوک وتـی دوئيـں ديوان اڈ کت انـت. ملک ءِ سياسی ءُ مالی  سيستم ءَ جـوڑينگ ءَ گلائيش بوت انت. بلئـے جناح ءُ مسلم ليگ  گـوں پلينڈی، دوتل ءُ دوپوستی  ءُ بـے بنياتيـں پاکستان ءِ پنجاپی پئوج ءِ زور ءَ په بلوچستان ءِ آوارجنگ ءُ بلـوچانــی ايردست کنگ ءّ وتی بلوچ دژمنيـں چيـريـں برنامه اِش جـوڑ کتگ اَتنـت البت گـوں انگريزانی سر ءُ سوج ءُ مــدت ءَ.
رنـد چه بلوچانـی وت ماں وت میڑينگ ءَ گڈسرا کلات ءِ سراِش هلگر کت ءُ ۲۷ مارچ ۱۹۴۸ ءَ رودراتکـی بلوچستان اِش په زور گـوں بـے بنياتـں پاکستان ءَ هوار کرت. 
بلوچ سرمچـار، سياسی سـروک ءُ راجــی کمـاش چـه هما دمان ءَ په ملـک ءِ آزاتی ءِ جنـگ ءِ ديمبری ءَ لانک اِش بست. هما جنگ ءُ جد ءُ جهـد که تـاں مروچــی  ديم په ســوب ءَ  جـاری انـت. اگاں چـه شست ءُ دو سال چه رودراتکـی بلوچستان ءِ آوارجنگ ءَ گوستگ بلئـے بلوچستان ءِ آجويـی ءِ جنــز پرزورتـر ءُ بلوچ جهدکارانــی رِداں بزتــر بؤگاينـت.

 
بلوچ ءُ بلوچستــان ءِ  دژمـں بزاں ايـران ءِ فاشيستيــں پارس واکــداران ءُ اسلام آباد ءِ انسـان دژمنيـں سياسی ءُ پئوجی ٹولــی ءَ په بلوچ جهدکارانی پروش ديگ ءَ يکدگـرا  سياسـی، مالـی ءُ پئـوجــی کمـک ءُ مدت کنگاينـت. اـے شومپاليــں همکـاری  په دو سبب ءَ مـاں هـَـنـدی تاريخ ءَ بے درورانــت. يکے ايش که بلوچستان ءِ چنت هزار ساليگيـں راجدپتر تـهءَ اے اولی رند انت که  بلوچ ءُ مزنيـں بهـرے چـه بلوچستان هندوستانــی مهـاجر ءُ پنجاپی يانی دست ءَ بنديگ انـت. دوئمی سبــب ايش که چـه بهٹو ءُ شاه ءِ دؤر بگــر تاں هنوں بزاں گيش چه چـل سال انـت که فاشيستيـں پارس، هندی مهاجـر ءُ بلـوچ دژمنيـں پنجاپـی هـورءُ تپاک انـت تنـکه بلوچستـان ءَ مـدامــی وتيگــی بکننـت ءُ هـوری ءَ بلـوچ راج ءَ ايردست بدار انـت. پـارس پاسدار، بسيجی ءُ پنجاپــی پئـوج گـوں مئی کـوم ءُ ملک ءَ همـا رستــری  کتـگ ءُ همــا زيادتــی کنگاينــت که آجوج ماجـوج ( مــُگــولاں ) يا اسکنـدرءَ هم چــُش نه کتــگ..

مروچـی بـزاں يازده اگسـت بلوچستــان ءِ راجدپتــر ءِ هما روچ انــت که ماں سوگيگيـں رودراتکی بلوچستان ءَ په گل ءُ شادهی يات کنـگ بيـت. بلئـے ايران ءِ بلوچ دژمنيــں واکدارانی کوشسـت همے بوتگ ءُ هست انــت که بلـــوچ مهلوک مـاں رونشتی بلوچستـان ءَ چه ۱۱ اگسـت ءِ روچ ءُ بلوچستــان ءِ آزاتی ءِ جار نامالـوم به بنــت. 
. 
چـه جاهليــں رضا ميرپنچ ءِ  سياهيــں دؤر بگــر تــاں مـروچـــی بــزاں مـاں گـوستگيـں هشتاد ءُ سئـے ســالاں تهران ءِ فاشيستيــں  زالمانی سياسـت ءُ کارکـرد  بلوچانی راجی پجـار ءُ بلـوچستــان ءِ  هـلاپ بوتگ. 
آ هشتاد ءُ سئـے سـال بـزاں چـه امـان الله جهانبانـی ءِ رستـری هلگــر مئـی ملـک ءِ سرا تـاں هنــوں کار کتـگ تنکه مئـی گنجيـں ملـک ءَ زوربرد بکننت. مئی راجـی دود ءُ ربيدگ ءُ مئی ماسی زبان ءَ گار بکننــت. مـا را گــوں وتــی راجدپتر ءُ تاريخ نامالــوم ءُ درآمــد بکــن انــت.  گـوں وتـی شونيستی وانينگـی سيستــم ءَ مئـی واننــده ءُ ورنايـاں   په زور پارس به تريننـت. هنچـوش که چه وتی راج ءُ راجی پجــّار ءَ دور به بنــت ءُ  پوستگيــں شونيسم پارس ءِ پگری گــلام به بنــت. 
یکــے چــه اے بلـوچ دژمنيـں سياست ءِ  برورد اں ( نتيجــه ياں ) ايش انـت کـه  چيـزـے بلـوچ ورنا مـاں رونشتی بلوچستــان ءَ « آسيميلـه » بوتگ انت. وتــی راج ءُ راجـی پجـار ءِ بنـداِش جتــگ ءُ ناهودگ ءَ کوشســت کننــت تاں وتا را گــوں شونيســـم پارس ءَ به لـَـچيـننــت .!
اداں هما پارس ءِ گپ بيگ انـت کـه سياسـی واکدار انـت. بلوچ ءِ زند جاور اِش چه جهندم ءَ گنتـر کتگ. بلوچانی باور ءُ دين ءِ بدل کنـگ لوٹنت. بلوچی زبان ءِ نزوری ءُ گارکنگ ءَ  بـے تهمبل انت ءُ اشتاپ کنگاينت. بلوچستان ءِ مال ءُ مادنان شپ ءُ روچ پل ءُ پانچ کنگاينـت۰ بلوچستان ءِ نيلبوئيـں مزن زر ءَ وتيگی اِش کتگ. بـے هساب بلوچ ورنايان اِش شهيد کتگ. مئی هاتونيـں گهار اِش جنوزام  ءُ مکئيـں ماتان اِش سوگيگ کتگ انت. هـزاراں بلـوچ تبل اِش چوره ءُ يتيم کتـگ انـت.

اپسـوزی گپـے انـت که چنــت بلـوچ  واننــده هنچـو چـه وتا ءُ وتــی کــوم ءَ  سستـگ ءُ درآمـد بوتگنـت  تهران ءِ شونيستيـں هکومت ءِ رستــری کارکرداں نه گنـدانـت يا کـه گـوں کرمـه گـوشــی ءُ په کســت انکار اِش کننــت.  
 
بلــوچ دژمنيـں تهـران ءِ واکــداراں گنـدگ ءُ زانـگ انـت که بلوچستـان ءِ آزاتـی ءُ بلوچانـی وت مستری ءِ دؤر نزيک 
بيگاينــت. پـه وتــی مالی ءُ سياســی نـپ ءُ پائـدگ ءِ بـرجـاه دارگ ءَ تکانســـر انــت. آ هچبــرنه لوٹنـت که بلوچستان ءِ وڑيــں گنجيــں ملکــے ءَ آزات ءُ وت مستر به گنـد انــت. بلئـے ايردستيـں راجانــی جد ءُ جهد ءُ بلوچستان ءِ تاريـخ پيش داريـت کـه آيوکيـں دؤر ءُ بلوچستـان ءِ بانـدات په زالــم ءُ زورانسرانـی دل ءِ تـب ءُ دلکــش نه بنــــت. اے بلـوچ راج انـت که وتـی باندات ءِ هدابـُنــد انـت نئــے هونواريـں رحمــان ملــک ءُ نئيکـه بلـوچ کشيــں نـجــّـار.
 
اگاں چـه تهـران ءِ واکـداراں، هندوستانــی مهاجـر ءُ پنجاپی ياں بلـوچ گلزميــں ء سرا باز زورانســری، کارهرابی ءُ زوالکاری  کتگ ءُ مئـے ملک ءُ مردم ءِ ديمـروی ءِ ديمپـاں بوتگ ءُ هست انـت بلئـے بلوچستان ءُ بلوچ انگت ءَ هست ءُ سربلنــدانـت. بلوچستان ءِ آزاتی ءُ وت مستـری انـت که مئـے آيوکيــں نسل ءُ پدريچـاں شريـں زنــد دات کت کنــت. پنجاپی، پارس ءُ گجـرءِ گـلامـی ءُ ايردسـت مانــَگ په بلوچــاں زيب ندنـت. بلــوچ وتـی راجی پجـّارءِ سرا پهــر بند ايـت ءُ بيــد گلامـی سانـکل ءُ زمزيــراں گـِهتـر ديـم په آسـراتی ءُ گهبـودی ءَ  شت کنــت.

 
بلوچستان ءِ آزاتـی ءِ روچ مبارک بات.

پروشـت ءُ پروش باتنــت ايران ءُ پاکستــان
آزات ءُ آبــاد بات گنجيـــں بلـوچستـــــــــان

محمــد کريــم بلــوچ

يازده اگست ۲۰۱۱